Ўзбекистон Миллий матбуот марказида Адлия вазирлиги томонидан 2025 йил якунларига бағишланган матбуот анжумани бўлиб ўтди. Унда тизимда амалга оширилган ислоҳотлар, эришилган натижалар ҳамда истиқболдаги устувор вазифалар юзасидан батафсил маълумот берилди.

Матбуот анжуманида таъкидланганидек, ҳисобот даврида фуқароларнинг ҳуқуқ ва қонуний манфаатларини ҳимоя қилиш, давлат хизматларини янада қулайлаштириш ва ҳуқуқий маданиятни ошириш борасида кенг кўламли ишлар амалга оширилди. Хусусан, 258 та норматив-ҳуқуқий ҳужжат ишлаб чиқилиб, 30 турдаги ортиқча ҳужжат талаб қилиш амалиёти бекор қилинди.

Шунингдек, “Бизнесни 15 дақиқада бошлаш” тамойили жорий этилиб, тадбиркорлик субектларига бир вақтнинг ўзида 7 та хизмат кўрсатиш йўлга қўйилди. “Проактив қонунчилик” асосида янги ҳужжатлар ҳақида автоматик хабардор қилиш тизими ишга туширилди ҳамда 1600 та мажбурий талаб бекор қилинди.  

Аҳолининг ҳуқуқий саводхонлигини ошириш мақсадида 1 миллиондан ортиқ тарғибот тадбирлари ташкил этилиб, “Ҳуқуқий маҳалла” лойиҳаси доирасида 1,8 миллионга яқин хонадон ўрганилди. Натижада аниқланган муаммоларнинг 97 фоизи ижобий ҳал этилди, минглаб фуқароларнинг ҳуқуқлари тикланди.  

Бундан ташқари, 2025  йилда 61 миллиондан ортиқ давлат хизматлари кўрсатилиб, хизматлар муддати кескин қисқартирилди. Нотариат ва таълим тизимида рақамлаштириш ишлари кенгайтирилиб, янги инновацион платформалар жорий этилди.  

Хулоса қилиб айтганда, 2025 йил якунлари Адлия вазирлиги томонидан фуқароларнинг ҳуқуқ ва қонуний манфаатларини таъминлаш, давлат хизматларини соддалаштириш ҳамда ҳуқуқий маданиятни юксалтириш борасида тизимли ва кенг қамровли ишлар амалга оширилганини кўрсатди. Норматив-ҳуқуқий базани такомиллаштириш, ортиқча бюрократик талабларни қисқартириш, тадбиркорликни қўллаб-қувватлашга қаратилган янги механизмларни жорий этиш ва аҳоли билан манзилли ишлаш натижасида фуқаролар учун янада қулай ва шаффоф ҳуқуқий муҳит шакллантирилди. Эришилган натижалар адлия тизимида амалга оширилаётган ислоҳотларнинг самарадорлигини тасдиқлаб, келгусида ҳам инсон манфаатларини устувор қўйган ҳолда ишларни изчил давом эттириш муҳим устувор вазифа бўлиб қолишини кўрсатди.