Бугун, Адлия вазирлиги томонидан Чилонзор туман Давлат хизматлари марказида “Давлат хизматлари соҳасидаги сўнгги янгиликлар” мавзусида матбуот анжумани ўтказилди.

Унда оммавий ахборот воситалари, жамоатчилик фаоллари ҳамда Адлия вазирлиги ҳузуридаги Жамоатчилик кенгаши аъзолари иштирок этди.

Давлат хизматлари департаменти бошлиғи Э.Махкамов тадбир иштирокчиларига соҳада амалга оширилаётган ислоҳотлар ҳамда келгусидаги режалар ҳақида маълумот берди. Хусусан, 9 ойда 19,7 миллиондан ортиқ давлат хизмати кўрсатилгани, бу эса 2022 йилга нисбатан қарийб 2,5 баравар ўсишни билдириши таъкидланди. Бугунги кунда мамлакатимизда 208 та Давлат хизматлари маркази фаолият юритиб, уларнинг 84 таси давлат-хусусий шериклик асосида ташкил этилган. Шунингдек, “Adliya QR” тизими жорий этилиб, фуқароларга ариза топшириш, тўловни амалга ошириш ва хизмат натижасини кузатиш имконини бермоқда.

Назорат тадбирлари натижасида қонун бузилиш ҳолатлари 3 баравар камайгани ҳам қайд этилди. Президентнинг 2025 йил 8 сентябрдаги ПФ–157-сон Фармони билан 2028 йилга қадар давлат хизматлари сони 900 тага етказилади, 30 турдаги ҳужжатларни топшириш талаби эса бекор қилинади.

Шу билан бирга, иштирокчилар томонидан берилган саволларга вазирлик масъуллари томонидан батафсил жавоб берилди. Тадбир якунида йиғилганлар учун Давлат хизматлари марказлари фаолияти билан визуал танишиш имконияти берилди.