Тошкентда онлайн авиабилет олиб беришни ваъда қилиб, фуқародан 21 миллион 500 минг сўмни алдаб олган шахс аниқланди. ИИВ Киберхавфсизлик марказининг маълум қилишича, у ўзини авиакасса сотувчиси деб таништирган. Тезкор-қидирув тадбирларида, жиноятни Наманган вилояти, Янгиқўрғон туманида яшовчи, муқаддам судланган 27 ёшли М.С. содир этганлиги аниқланди. Маълум бўлишича, М.С., Тошкент шаҳрида яшовчи 58 ёшли К.Р. билан “Телеграм” мессенжеридаги “Aviasales,uz” каналида танишиб, унга онлайн билет олиб беришини айтган, 21.500.000 сўмни ўзининг банк картасига ўтказиб олган ва ёзишмаларни ўчириб юбориб, уни қора рўйхатга киритиб қўйган. Ҳозирда М.С.га нисбатан Жиноят кодексининг 168-моддаси 3-қисми билан жиноят иши қўзғатилиб, тергов ҳаракатлари олиб борилмоқда. Қонунчиликда ушбу жиноят учун 3 йилдан 5 йилгача озодликдан маҳрум қилиш жазоси назарда тутилган.