Россия Президенти Владимир Путин ва Шимолий Корея етакчиси Ким Чен Ин кенгайтирилган таркибдаги музокарани якунлади. Кремль матбуот котиби Дмитрий Песков яккама-якка учрашув бошланганини маълум қилди, деб хабар берди UzA. Россия – Корея муносабатига тўхталар экан, у Россия ҳар қандай сиртқи чақириқ, изоҳларга қарамай, КХДР билан алоқани ўзаро манфаатли асосда ўрнатишини айтди. Унинг қайд этишича, Россия БМТда КХДРга қарши санкция масаласида мавжуд позициясини сақлаб қолади, бироқ бу Россия – Шимолий Корея муносабати ривожланишига тўсқинлик қила олмайди. Фақат икки суверен давлатга тегишли ўзаро муносабат бошқа давлатларни ташвишга солмаслиги керак. Кремль вакили, шунингдек, Путин ва Ким Чен Ин ўртасидаги музокара якуни бўйича ҳужжат имзолаш режалаштирилмаганини қайд этди. Путин ва Ким Чен Ин учрашуви янги Aнгара ракетаси йиғилаётган, ракета ўрнатиладиган ва синовдан ўтказиладиган бинода бўлиб ўтган. Икки давлат раҳбарлари ўзаро ва журналистлар билан қисқача суҳбатлашган. Россия Президенти ва олий мартабали меҳмон “Восточний” космодромидаги объектларни кўздан кечирган. Етакчиларнинг “Aнгара” ракетаси йиғиладиган майдончага ташрифи, “Союз-2» ташувчисини учириш мажмуасини кўздан кечириши ҳам кутиляпти. Космодром кўздан кечирилгач, шу ҳудудда тўғридан-тўғри юқори даражадаги Россия — КХДР музокараси режалаштирилган. Таъкидланишича, Путин ва Ким Чен Ин биринчи навбатда икки томонлама муносабатга эътибор қаратади, шунингдек минтақа ва халқаро майдондаги вазият юзасидан фикр алмашади.