23 май куни таниқли қиличбоз, Ўзбекистон қиличбозлик федерацияси бош ҳаками, халқаро тоифадаги ҳакам Аида Хасанова 39 ёшида вафот этди, деб хабар қилинди федерация сайтида. «Газета.uz»га кўра, ўша куни у Тошкентдаги хусусий клиникалардан бирида косметологик операция қилинган. Клиникада аҳволи оғирлашгач бемор шифокорнинг қарори билан бошқа шифохонага кўчирилган, бироқ кечқурун у жонлантириш бўлимида вафот этган. Ўлим сабабларини аниқлаш учун суд-тиббий экспертиза тайинланган. Айни пайтда Чилонзор тумани прокуратураси томонидан терговга қадар текширув ўтказилмоқда. Аида Хасанова дунёнинг қиличбозлик бўйича бешта энг кучли ҳакамларидан бири ҳисобланган. У 1983 йилда Тошкентда туғилган. Кўп карра Ўзбекистон чемпиони, 2001−2006 йилларда Марказий Осиё чемпиони, 2005 йилда Англияда ўтказилган халқаро турнир олтин медали совриндорига айланган. 2014 йилда у уч турдаги қуроллардан фойдаланган ҳолда қиличбозлик бўйича Ўзбекистон тарихидаги биринчи халқаро ҳакам бўлди. Ўша йилдан бошлаб у Халқаро қиличбозлик федерацияси (FIE) ҳаками бўлиб, йирик халқаро чемпионат ва турнирларда ишлаган. Қиличбозлик ривожига қўшган улкан ҳиссаси учун 2017 йилдан Ўзбекистон қиличбозлик федерациясига бош ҳакам этиб тайинланган. У халқаро мусобақаларда юқори натижаларга эришган кўплаб спортчиларни тарбиялаган.