Судланувчи Раҳмонали Шодиев ( исм-шарифлар ўзгартирилган) 2006-йилда Косонсой туманида туғилган. Наманган давлат техника университетининг  1-курс талабаси. Олийгоҳда грант асосида таҳсил олади. Бу йигитни суднинг қора курсисига нима етаклади экан, деган савол туғилиши табиий. Ростдан ҳам айни 19 ёшида талаба йигит нега  судланди?

Ҳаммаси  туғилган кунида уйидагиларнинг унга янги телефон совға қилганидан бошланди. Телефонига янги сим карта олган йигитча  интернетдан Rayme иловасини юклаб олди. Янги олган сим картасидаги телефон рақамида аввалги мижоз – Ноила Халиловага тегишли бўлган  Rayme иловаси сақланиб қолганига  кўзи тушиб,   телефон рақамига уланган “Агробанк” АТБ Навоий вилоят филиалида расмийлаштирилган банк пластик картасидаги пулларни кўриб қолди. Хаёлини   текин пулни қўлга киритиш  нияти эгаллаб олди. Ўйлаб ўтирмасдан Н. Халиловага тегишли банк картасидан 2 миллион 100 минг сўм миқдоридаги пулни ўзининг “Ипак йўли” банки АТБ Наманган вилоят филиалида расмийлаштирилган банк картасига кўчириб олиб,  шахсий эҳтиёжларига ишлатиб  юборди.

Унинг бу қинғир иши Н. Халилованинг корхонада хизмат вақтида вафот этган турмуш ўртоғи учун ишхонасидан  ҳар ойда тўланадиган нафақа пулини банкдан  ечиш учун банкоматга борганида  фош бўлди. Ноила картада бир тийин ҳам пул йўқлигидан таажжубланиб, ижтимоий ёрдам  тўлайдиган катта корхонага қўнғироқ қилиб пул тушмаганини билдирди. Корхонадагилар эса  пулни аллақачон унинг картасига кўчирилганини айтишди. Шундан  сўнг Ноила банкдан картадаги пул айланмаларини олиб кўрганида пул Раҳмонали Шодиев томонидан ечилганидан, банк ходимлари берган тўлиқ маълумотга кўра пулни Наманган вилоятида истиқомат қилувчи йигит ечиб олганидан хабардор бўлди. Н. Халилова Раҳмоналига  қўнғироқ қилиб, бу пулларни қайтариб беришини сўради. Талаба йигит “бу пулларни стипендиям бўлса керак деб ўйлабман” деб, гарчи ўзини оқлашга уринган бўлса-да, аслида ишидан пушаймонлигини билдирди. Навоийга келиб  пулни эгасига қайтарди. Аммо жиноят содир этилгани аниқ, жиноятга эса жазо муқаррар. У ўғрилик, ўзганинг мулкини қонунга хилоф равишда ( рухсатсиз) ахборот тизимига кириб ундан фойдаланиб, яширин равишда талон-торож қилиш жиноятини қасддан содир этганликда айбдор деб топилди. Талабалик олтин даврида суднинг қора курсисига ўтирган йигит ўз оёғига ўз қўллари билан ўзи кишан солди – 3 йил муддатга озодликни чеклаш жазосига маҳкум бўлди.

Бугунги ахборот асрида  кўпчилик ёшлар ахборот технологияларидан фойдаланиб, дунё ёшлари билан тенглашиб, катта марраларни кўзлаб, баланд чўққиларни эгаллаётган бир пайтда  Раҳмоналига ўхшаган йигитлар  эса ахборот тизимидан  нафс йўлида фойдаланиб, ўзига чоҳ қазиётгани ачинарли албатта.

Шу ўринда бундай  тўғри йўлдан адашганларга қўл келадиган имкониятларни яратиб бераётган содда ва   эътиборсиз замондошларимиз ҳам телефон рақамларига уланган банк карталарига, шахсга доир барча ҳужжатларига бефарқ бўлмасликларини, Ноилага ўхшаб ҳамёндан айрилиб қолмасликларини эслатишни жоиз деб билдик. Халқимизнинг “Ўзингга эҳтиёт бўл, қўшнингни ўғри тутма!” деган мақолини тез-тез  эслаб туринг!

Маруса ҲОСИЛОВА,

                                                                            журналист