Эндиликда мажбурий тўловларни ундириш учун ариза топширишда қарздорнинг тармоқлардан узилганлигини тасдиқловчи ҳужжат илова қилиниши керак.

28 август куни президент томонидан имзоланган қонун билан айрим қонун ҳужжатларига қўшимча ва ўзгартиришлар киритилди.

Хусусан, “Суд ҳужжатлари ва бошқа органлар ҳужжатларини ижро этиш тўғрисида"ги қонунига янги талаблар киритилмоқда.

Электр ва газ учун мажбурий тўловларни ундириш тўғрисидаги ариза ваколатли органга ёки мансабдор шахсга берилгунигача қарздор энергия ресурслари тармоқларидан узилганлигини тасдиқловчи ҳужжатлар ижро ҳужжатларига илова қилиниши керак. Бу талаб бажарилмаса, давлат ижрочиси ижро ҳужжатини қайтаради.

Шунингдек, жисмоний шахслардан почта харажатларини ундириш тўғрисидаги суд ҳужжатларига нисбатан ижро ишини юритишнинг соддалаштирилган тартиби қўлланилади.

Бундан ташқари, Фуқаролик процессуал кодексига ҳам қўшимча талаблар киритилди. Унга кўра, электр энергияси ёки табиий газ учун қарздорликни ундириш ҳақидаги суд буйруғини бериш тўғрисидаги аризага компания қуйидагиларни илова қилиши керак:

• истеъмолчи билан тузилган шартнома;
   
• пеня ҳисобланиши ҳақидаги маълумот ва тегишли тармоқлардан узиш тўғрисидаги огоҳлантириш кўрсатилган, қарзни тўлаш ҳақидаги талабнома;
   
• қарздорга тўлов талабномаси юборилганлигини тасдиқловчи ҳужжат;
   
• истеъмолчи тегишли энергия ресурслари тармоқларидан узилганлигини тасдиқловчи ҳужжат.

Қонун расмий эълон қилинган кундан эътиборан кучга киради.