Ўзбекистонда экологик тоифаси аниқланган автотранспорт воситасига экологик стикерни энди онлайн олиш мумкин.

Бунинг учун Ягона порталга ёки унинг мобил иловасига кириб, қидирув сатрига “Экологик стикер” деб ёзиш ёки “Транспорт” бўлимидан “Автотранспорт воситасига экологик стикер олиш” хизматини танлаш лозим.

Мазкур хизмат автомобилларни экологик тоифаларга ажратиш ва экостикер бериш жараёнини соддалаштириш ҳамда фуқаролар учун қулайлик яратиш мақсадида жорий этилди.

Хизматни қўллаш учун фойдаланувчилар my.gov.uz сайти ёки мобиль иловасига кириб, “Экологик стикер” ёки “Транспорт” бўлими орқали “Автотранспорт воситасига экологик стикер олиш” хизматини танлаши кифоя. Ариза топшириш жараёнида автомобильга оид маълумотлар тизимда автоматик тарзда шакллантирилади ва фойдаланувчи фақат аризани тасдиқлайди.

Расмийлаштирилган экостикер ариза топширилган кундан бошлаб 10 календарь куни ичида почта орқали фуқаронинг кўрсатилган манзилига етказиб берилади.

Экологик стикернинг ўзи ва уни расмийлаштириш хизмати бепул ҳисобланади. Фақатгина стикерни почта орқали етказиб бериш учун 20 600 сўм миқдорида тўлов ундирилади.

Маълумот учун, 2025 йил ноябрь ойида ҳукумат қарори билан автотранспорт воситаларини экологик тоифаларга ажратиш тартиби тасдиқланган. Унга кўра, бензин, сиқилган ва суюлтирилган газда ҳаракатланувчи автомобиллар Евро-2 ва ундан юқори стандартларда “тоза”, Евро-0 ва Евро-1 стандартларида эса “ўрта” тоифага киритилади. Дизел двигателли автомобиллар учун Евро-4 ва ундан юқори “тоза”, Евро-3 “ўрта”, Евро-0, Евро-1 ва Евро-2 эса “зарарли” тоифа сифатида белгиланади.

Шунингдек, гибрид, муқобил ёқилғида ҳаракатланувчи ҳамда ишлаб чиқарилганига уч йилдан ошмаган транспорт воситалари автоматик тарзда “тоза” экологик тоифага киритилади.