Меҳнат қонунчилигида ҳомиладор аёллар ҳамда ёш болали ходимларнинг ҳуқуқлари алоҳида ҳимоя қилинади. Хусусан, бюджетдан молиялаштириладиган ташкилотларда ишлайдиган 3 ёшга тўлмаган боласи бор ота-оналарга иш вақтининг қисқартирилган давомийлиги белгиланиши, бундай ҳолатда меҳнатга ҳақ тўлаш тўлиқ иш вақтида ишловчи ходимлар учун назарда тутилган миқдорда амалга оширилиши кафолатланади. Шунингдек, ҳомиладор аёллар ва ёш болали ходимларни тунги ишларга, иш вақтидан ташқари ишларга ҳамда хизмат сафарларига жалб қилиш фақат қонунчиликда белгиланган тартиб ва шартларга риоя этилган ҳолдагина амалга оширилиши мумкин.

3 ёшга тўлмаган боланинг бюджетдан молиялаштириладиган ташкилотларда ишлайдиган ота-онасидан бирига (васийсига) ҳафтасига 35 соатдан ошмайдиган иш вақти давомийлиги белгиланади.

Иш вақтининг қисқартирилган давомийлигида ходимлар меҳнатига ҳақ тўлаш ҳар кунги тўлиқ иш давомийлигида ишлайдиган ходимлар учун белгиланган миқдорда амалга оширилади.

Ҳомиладор аёллар, 14 тўрт ёшга тўлмаган боланинг (16 ёшга тўлмаган ногиронлиги бўлган боланинг) ота-онасидан бири (ота-онасининг ўрнини босувчи шахс) фақат ўз ёзма розилиги билан тунги ишларга, иш вақтидан ташқари ишларга, дам олиш кунларидаги ва ишланмайдиган байрам кунларидаги ишларга жалб қилиниши, шунингдек хизмат сафарига юборилиши мумкин. Бунда иш берувчи мазкур ходимларни тунги ишлардан, иш вақтидан ташқари ишлардан, дам олиш кунларидаги ва ишланмайдиган байрам кунларидаги ишлардан ёки хизмат сафаридан воз кечиш борасидаги ҳуқуқи тўғрисида хабардор қилиши шарт.

Ҳомиладор аёлларни ва 3 ёшга тўлмаган боласи бор аёлларни тунги ишларга жалб қилишга бундай иш ҳомиладор аёлнинг ҳамда боланинг ҳаётига ва соғлиғига хавф туғдирмаслигини тасдиқловчи тиббий хулоса мавжуд бўлган тақдирдагина йўл қўйилади.