Бугунги кунда ногиронлиги бўлган шахсларни ҳар томонлама қўллаб-қувватлаш бўйича бир қатор ислоҳотлар амалга оширилмоқда. Шундай ислоҳотлардан бири Ўзбекистон Республикаси Президенти ҳузуридаги Ижтимоий ҳимоя миллий агентлигининг ташкил этилиши бўлди. Ижтимоий ҳимоя миллий агентлигининг ҳудудий бошқармалари сифатида маҳаллий ҳудудларда инсон ижтимоий хизматлари марказлари фаолияти йўлга қўйилди.

“Инсон” ижтимоий хизматлар марказларининг мақсади – ижтимоий ҳимояга муҳтож аҳоли қатламига маҳалла даражасида комплекс ижтимоий хизмат ва ёрдам кўрсатишдир. Улар қуйидаги вазифаларни амалга оширади:

1.   Оғир аҳволга тушиб қолган ёки тушиб қолиш хавфи бўлган шахслар ва оилаларга маҳалла даражасида комплекс ижтимоий хизмат ва ёрдам кўрсатиш. Бунда ҳар бир ижтимоий ҳимояга муҳтож оиланинг кам таъминланганлик даражаси атрофлича ўрганилиб, уларни камбағалликдан чиқариш бўйича, чора тадбирлар кўрилади.

2.   Ўзгалар парваришига муҳтож ёлғиз яшайдиган шахслар ёки ёлғиз кексалар ва ногиронлиги бўлган шахсларга қуйидаги хизматларни кўрсатиш:

• Уйда парвариш қилиш;

• Уларни қўллаб-қувватлаш  ва реабилитация қилиш;

• стационар тартибда соғломлаштириш.

3. Ногиронлиги бўлган шахсларни протез-ортопедия мосламалари ҳамда реабилитация қилишнинг техник воситалари билан таъминлаш; Албатта, бунда шахсларнинг ушбу воситаларга муҳтожлилик даражаси текширилади. Уларга шунга асосланиб маълумотномалар берилади.

Шунингдек, инсон ижтимоий хизматлари марказлари ногиронлиги бўлган шахслар учун қуйидаги хизматларни таклиф этади:

• Протез-ортопедия мосламалари ва реабилитация қилишнинг техник воситаларини олиш учун сертификатни расмийлаштириш;

• Талабгорларни ўзгалар парваришига муҳтож бўлган шахс деб эътироф этиш;

• Ўзгалар парваришига муҳтож бўлган ёлғиз кексалар ва ўзгалар парваришига муҳтож ёлғиз ногиронлиги бўлган шахсларга моддий ёрдам тайинлаш ва тўлаш;

• Протез мосламалари ёки реабилитация воситаларини олиб бериш учун ҳомийлик қилиш истагини билдирган шахсларга тегишли ҳудуддаги муҳтож шахсларнинг рўйхатини тақдим этиш;

• Муҳтож шахс номидан протез мосламалари ёки реабилитация воситалари учун буюртмани шакллантиришда кўмаклашиш.

Ногиронлиги бўлган шахслар ўзлари истиқомат қиладиган ҳудуддаги инсон ижтимоий хизматларига бориб тўғридан тўғри мурожаат қилишлари мумкин. «Инсон» ижтимоий хизматлар марказларига бевосита ўзлари бориб мурожаат қилишлари мумкин. Инсон ижтимоий хизматлари марказига мурожаат қилиш мутлақо тўловсиз шаклда амалга оширилади. Шунингдек, ногиронлиги бўлган шахслар 1140 ёки 1146 қисқа ишонч рақамлари орқали ҳам мазкур марказларга онлайн шаклда мурожаат қилиш имкониятига эгалар.