my.gov.uz порталида ўқув маркази очиш учун субсидия ажратишнинг навбатдаги босқичи бошланди. Қишлоқ ҳудудларида хорижий тилларни ўргатувчи ўқув маркази очмоқчи бўлганлар my.gov.uz портали орқали субсидия олиш учун ариза қолдиришлари мумкин. my.gov.uz расмий телеграм каналида маълумот берилишича, талабгорлар 10 июлга қадар «Қишлоқ ҳудудларида хорижий тилларни ўқитиш фаолиятини ташкил этиш учун нодавлат таълим ташкилотларига субсидия ажратиш” хизматидан фойдаланишлари мумкин. Бу турдаги субсидия қуйидаги мақсадларда ажратилади:

• бино ва ўқув хоналарини замонавий ахборот коммуникация технологиялари, мебель, асбоб-ускуналар, ўқитишнинг техник воситалари ва бошқа анжомлар билан жиҳозлашга;
• зарур дарсликлар, ўқув-методик адабиётлар ва бошқа кутубхона-ахборот ресурслари ҳамда воситалари билан таъминлаш, таълим жараёнини ташкил этишга жалб этиладиган педагог кадрлар меҳнатига ҳақ тўлашга.Қуйидаги ҳужжатлар талаб этилади:
• 2 йилга мўлжалланган бизнес режа;
• маҳсулот етказиб бериш ёки ишларни, хизматларни бажариш тўғрисида тузилган хўжалик шартномалари;
• педагог кадрлар билан тузилган меҳнат шартномалари;
• педагог кадрларнинг хорижий тилни билиш даражасини тасдиқловчи сертификатлари;
• таълим жараёнида фойдаланилаётган бино ёки ўқув хоналарининг ижара шартномаси (кўчмас мулк ижараси асосида фаолият юритаётган нодавлат таълим ташкилотлари учун).

Ҳукуматнинг 2022 йил 20 сентябрдаги 513-сонли қарори билан қишлоқ ҳудудларида хорижий тилларни ўқитиш фаолиятини ташкил этиш учун нодавлат таълим ташкилотларига маҳаллий бюджет маблағлари ҳисобидан бир марталик субсидия ажратиш бўйича давлат хизматлари кўрсатишнинг маъмурий регламенти тасдиқланган.