Коррупция лотинча “corrumpere” сўзидан олинган бўлиб, “бузмоқ” деган маънони билдиради. Коррупция – шахснинг ўз мансаб ёки хизмат мавқеидан шахсий манфаатларини ёхуд ўзга шахсларнинг манфаатларини кўзлаб моддий ёки номоддий наф олиш мақсадида қонунга хилоф равишда фойдаланиши, худди шунингдек, бундай нафни қонунга хилоф равишда тақдим этишни англатади.

Бугунги кунда дунёда коррупция турли шаклларда намоён бўлмоқда: пора, мансабдор шахсни “ўзига оғдириб олиш”, “устама ҳақ” олиш, давлат ресурсларини ўзлаштириш, растрата, таниш-билиш йўли билан ўз яқинларини лавозимга тайинлаш, давлат функцияларини амалга оширишда манфаатлар тўқнашуви, муайян масалани ҳал этишда қимматбаҳо совғалар бериш ва олиш, давлат хизматчисининг “бизнесга ноқонуний раҳнамолик” қилиши, мансабини суиистеъмол қилган ҳолда фуқароларда ҳуқуқини талаб қилиш истагини йўқотиш, суднинг мустақиллигига дахл қилиш, сунъий дефицит вужудга келтириш, сиёсатчиларнинг халққа “яхши киши бўлиб кўриниши” учун ўз мавқеидан фойдаланган ҳолда қонунга хилоф равишда давлат хизматларини кўрсатиши кабилар шулар жумласига киради.

Шу маънода, коррупцияга қарши курашиш соҳасидаги давлат сиёсатининг асосий йўналишлари сифатида қуйидагиларни кўрсатиб ўтишимиз мумкин: аҳолининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш; давлат ва жамият ҳаётининг барча соҳаларида коррупциянинг олдини олишга доир чора-тадбирларни амалга ошириш; коррупцияга оид ҳуқуқбузарликларни ўз вақтида аниқлаш, уларга чек қўйиш, уларнинг оқибатларини, уларга имкон берувчи сабаблар ва шарт-шароитларни бартараф этиш, коррупцияга оид ҳуқуқбузарликларни содир этганлик учун жавобгарликнинг муқаррарлиги принципини таъминлаш.

Коррупцияга қарши курашиш бўйича фаолиятни бевосита амалга оширувчи давлат органлари сифатида қуйидаги органларни санаб ўтиш мақсадга мувофиқ бўлади: Ўзбекистон Республикаси Коррупцияга қарши курашиш агентлиги; Ўзбекистон Республикаси Бош прокуратураси; Ўзбекистон Республикаси Давлат хавфсизлик хизмати; Ўзбекистон Республикаси Ички ишлар вазирлиги; Ўзбекистон Республикаси Адлия вазирлиги; Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти.

Бекжон Исмоилов,
"Адолат" МҲАМ ходими