Ажратилган маблағлар мамлакат бўйлаб 230га яқин перинатал марказларни модернизация қилишга ёрдам беради.

Осиё тараққиёт банки (ОТБ) Ўзбекистонга ҳомиладор аёллар ва уларнинг янги туғилган чақалоқлари учун перинатал соғлиқни сақлаш хизматларини яхшилашга кўмаклашиш учун $100 млн миқдорида имтиёзли кредит ажратишни маъқуллади. Бу ҳақда банк рамсий сайтида эълон қилинди.

“ОТБ Ўзбекистонда аёллар ва болалар саломатлигини муҳофаза қилиш, оналар ва неонатал ўлимни камайтириш мақсадида Ўзбекистонда юқори сифатли перинатал тиббий хизматлар кўрсатиш бўйича ҳукумат мажбуриятини қўллаб-қувватлайди”, — деди банкнинг Марказий ва Ғарбий Осиё бўйича Бош директори Евгений Жуков.

Интеграциялашган перинатал ёрдам лойиҳаси бутун мамлакат бўйлаб қарийб 230 перинатал марказни модернизация қилиш учун ажратилди.

Шунингдек, уларни замонавий энергия тежовчи тиббий асбоб-ускуналар, янгиланган клиник стандартлар ва протоколлар, тиббиёт ходимларининг салоҳияти ва сифатини таъминлаш механизмлари билан жиҳозлашда ёрдам беради.

Лойиҳа, шунингдек, перинатал йўлланма тизимини такомиллаштиради ва тез ёрдам гуруҳларини кучайтириш ҳамда соғлиқ учун хавфларни эрта аниқлаш ва ҳомиладорлик мониторинги учун беморларнинг электрон қайдларини жорий этиш орқали тегишли ва ўз вақтида ҳаётни сақлаб қолувчи ёрдамдан фойдаланиш имкониятларини кенгайтиради.

Ўзбекистонда оналар ўлими 2010-йилда ҳар 100 минг тирик туғилган чақалоққа 38 ўлимдан 2020 йилда 30 ўлимгача яхшиланган бўлса-да, Европа ва Марказий Осиёдаги ўртача кўрсаткичдан юқорилигича қолмоқда.

Мамлакатда неонатал ўлим кўрсаткичлари илгари яхшиланган бўлса-да, кейинги йилларда туғилишнинг ўсиши фонида бу кўрсаткич ҳам ошди.