Рухсатномасиз кўп квартирали уй қуриш энди нафақат маъмурий, балки жиноий жавобгарликка ҳам сабаб бўлиши мумкин. Янги қонун билан қурилиш соҳасида давлат назорати кучайтирилиб, белгиланган талабларни бузганлик учун озодликдан маҳрум қилишгача бўлган жазо чоралари белгиланди.

 

Қурилишни бошлаш учун рухсатнома керак

2026 йил 28 сентябрдаги ЎРҚ-1179-сон Қонун билан қурилиш соҳасида давлат назорати ва бошқарувини янада такомиллаштиришга қаратилган ўзгартириш ва қўшимчалар киритилди.

Жумладан, «Лицензиялаш, рухсат бериш ва хабардор қилиш тартиб-таомиллари тўғрисида»ги Қонунга киритилган ўзгартишларга мувофиқ, қурилиш-монтаж ишларини бошлаш учун қурилиш ва уй-жой коммунал хўжалиги соҳасида назорат қилиш ҳудудий инспекцияларидан рухсатнома олиш талаб этилади.

 

Рухсатсиз кўп квартирали уй қуриш — жиноят

Қонун билан Жиноят кодексига ҳам тегишли ўзгартишлар киритилди.

Унга кўра, кўп квартирали уйларни қурилиш ва уй-жой коммунал хўжалиги соҳасида назорат қилиш инспекцияларининг рухсатномасисиз қуриш, агар бундай ҳаракат учун шахсга аввал маъмурий жазо қўлланилганидан кейин содир этилган бўлса, жиноий жавобгарликка сабаб бўлади.

Бундай қилмиш учун уч йилдан беш йилгача озодликдан маҳрум қилиш жазоси белгиланди.

Шу тариқа, рухсатсиз қурилишни маъмурий жазодан кейин ҳам давом эттириш жиддий ҳуқуқий оқибатларга олиб келиши мумкин.

 

Оғир оқибатлар бўлса, жазо янада кучаяди

Шунингдек, шаҳарсозлик тўғрисидаги қонунчиликни бузиш натижасида одам ўлиши ёки бошқа оғир оқибатлар келиб чиқса, жиноий жавобгарликнинг янада оғир тури қўлланилади.

Бундай ҳолатда беш йилдан етти йилгача озодликдан маҳрум қилиш жазоси белгиланган.

 

Янги талаблар қурилиш хавфсизлигини кучайтиришга қаратилган

Киритилган ўзгартишлар қурилиш жараёнида белгиланган рухсат бериш тартибларига риоя этилишини таъминлаш, шаҳарсозлик соҳасидаги назоратни кучайтириш ҳамда фуқароларнинг ҳаёти ва хавфсизлигини муҳофаза қилишга қаратилган.

Шу сабабли кўп квартирали уй қурилишини бошлашдан олдин тегишли рухсатнома талабларини бажариш муҳим аҳамият касб этади.