Ўзбекистон Буюк Британиянинг BBC, АҚШнинг CNN, Европанинг “Euronews” жаҳон телекомпаниялари, АҚШнинг йирик Netflix ва “Amadeus” онлайн-стриминг платформалари, Хитойнинг “Trip.com” онлайн-саёҳат платформаси, Бирлашган Араб Амирликларининг “Holiday factory” сайёҳлик компанияси, “Visa Fasilitation Services Global” компанияси маъмурияти билан туризм салоҳиятини тарғиб қилиш юзасидан келишувга эришган. Бу ҳақда “Ўзбекистон маданий мероси – Янги Ренессанс асоси” мавзусидаги халқаро анжуманда қайд этилди. Ўтган 5 ойда Ўзбекистон хорижий сайёҳлар ташрифидан қарийб 900 млн АҚШ доллари миқдорида туристик хизматларни экспорт қилган. Тадбирда қайд этилишича, 2023 йил январь-май ойларида мамлакатга 2,6 млн. нафар хорижий туристлар ташриф буюрган ва 833,5 млн. АҚШ доллар миқдорида туристик хизматлар экспорти амалга оширилган. Бу кўрсаткич 2022 йилнинг мос даврига нисбатан 2 баробарга ошган. Келтирилишича, жорий йилда мамлакатга 10,0 млн нафар хорижий сайёҳ жалб қилиниб, 20,0 млн нафар маҳаллий аҳолининг саёҳатлари ташкил этилади. Бунинг натижасида 2,0 млрд доллар миқдорида туризм хизматлари экспорти амалга оширилади. Йил якунига қадар зиёрат туризми йўналишида Туркия, Индонезия, Малайзия, Покистон, Бангладеш, Япония, Исроил, Ҳиндистон ҳамда МДҲ давлатларидан 1,2 млн. нафар зиёратчилар жалб қилинади. 170 та меҳмонхона, 72 та хостел, 48 та бошқа тоифадаги жойлаштириш воситалари, жами 290 та жойлаштириш воситалари ташкил этилади, соҳада 50 мингта иш ўрни яратилади, 492 та янги оилавий меҳмон уйлари ташкил этилади.