2025 йил 10 декабрь куни Президентнинг “Нақдсиз ҳисоб-китобларни оммалаштириш ва яширин иқтисодиёт улушини қисқартиришга қаратилган қўшимча чора-тадбирлар тўғрисида”ги ПФ–246-сон Фармони қабул қилинди.

Мазкур Фармон билан 2030 йилгача яширин иқтисодиёт улушини қисқартиришнинг асосий мақсадли кўрсаткичлари белгиланди.

Шунингдек, 2026 йил 1 апрелдан қуйидагилар учун тўловлар фақатгина банк карталари ёки электрон тўлов тизимлари орқали амалга оширилади:

— давлат органлари томонидан кўрсатиладиган хизматлар;

— электр энергияси, табиий газ, ичимлик сувидан фойдаланганлик учун тўловлар;

— алкоголь ва тамаки маҳсулотлари;

— транспортларга ёқилғи қуйиш шохобчалари орқали аҳолига нефть-газ маҳсулотларини сотиш ва электрда ҳаракатланадиган транспортларни зарядлаш бўйича хизматлар;

— қиймати 25 млн сўмдан ошадиган товар ва хизматлар;

— кўчмас мулк объектлари, ишлаб чиқарилганига 10 йилдан ошмаган M, N, O ва G тоифага кирувчи транспортлар ҳамда махсус автотранспорт воситаларини сотиш ва сотиб олиш.

Мазкур Фармон билан сертификатлаш ва божхона расмийлаштирувига ҳам бир қатор ўзгартиришлар киритилди, унга кўра 2026 йил 1 январдан бошлаб битта ташқи савдо шартномаси доирасида айнан бир хил турдаги товарларга мувофиқлик ва экологик сертификат бир календарь йилдан ошмаган муддатга бир маротаба берилади.

Бундан ташқари, 2026 йил 1 апрелдан бошлаб қадар юк ташиш ва махсус автотранспорт воситалари хизматлари ҳисобини онлайн юритишни назарда тутувчи электрон платформа ишга туширилади.

Даромадлари тўғрисидаги декларациялаш тизими ишга туширилади. 2026 йил 1 мартдан бошлаб солиқ органлари ходимлари ҳамда Навоий ва Чирчиқ шаҳарларида ҳисобга қўйилган жисмоний шахслар томонидан жами йиллик даромадлари тўғрисидаги декларацияни тақдим этиш амалиётини тажриба-синов тариқасида жорий этилади. Бунда:

— жисмоний шахсларнинг харажатлари вазирлик ва идоралардан олинган маълумотлар ҳамда солиқ органларининг махсус мобил иловаси орқали рўйхатдан ўтказилган товарлар (хизматлар) хариди бўйича фискал белгили чеклар ва электрон ҳисобварақ-фактуралар асосида ҳисобланади;

— махсус электрон платформа орқали соддалаштирилган тарзда декларация тақдим этиш тартиби белгиланади;

— йиллик даромадлар ва харажатларнинг рақамли маълумотлари асосида солиқ базаси аниқлаштирилади. Бунда:

— даромадлар ва харажатлар тўғрисидаги маълумотлар етарли бўлмаган тақдирда, жисмоний шахсларга солиқ органларининг махсус мобил иловаси орқали қўшимча маълумотларни киритиш имконияти яратилади;

— аниқлаштирилган солиқ базаси юзасидан қўшимча солиқ ҳисобланмайди ва ҳуқуқий таъсир чоралари қўлланмайди.