Қонунчиликка кўра, ота-оналик ҳуқуқидан маҳрум қилинган ота ёки она ўз боласига нисбатан бир қатор ҳуқуқлардан маҳрум бўлади. Мисол учун, болага боғлиқ имтиёзлар, нафақалар ва боладан таъминот олиш ҳуқуқи бекор бўлади. Бироқ ота-она мазкур ҳуқуқлардан маҳрум қилинса ҳам, болага алимент тўлашдан озод этилмайди.

Агар болани ота ёки онасига беришнинг имкони бўлмаса ёки ҳар иккаласи ҳам ота-оналик ҳуқуқидан маҳрум қилинган бўлса, бола васийлик ва ҳомийлик органи қарамоғига берилади.

Шунингдек, ота-она (улардан бири) ота-оналик ҳуқуқидан маҳрум қилинганидан кейин болани бошқа шахслар фарзандликка олмоқчи бўлса, бу фақат суд қарори чиқарилган кундан кейин камида 6 ой ўтгач амалга оширилиши мумкин.

Ота-оналик ҳуқуқини тиклаш мумкинми? деган савол кўпчиликни қизиқтириши мумкин.

Ха албатта, агар ота-она ёки улардан бири ўз хулқ-атворини, турмуш тарзини ва болага бўлган муносабатини яхши томонга ўзгартирса, уларнинг ота-оналик ҳуқуқи тикланиши мумкин. Бундай иш ота-онанинг ўзи томонидан судга берилган даъво асосида кўриб чиқилади. Ушбу даъво билан бирга болани ота-онага (улардан бирига) қайтариш тўғрисидаги талаб ҳам кўриб чиқилиши мумкин.

Бола 10 ёшга тўлган бўлса, унинг розилигисиз ота-оналик ҳуқуқи тикланмайди.

Энг муҳим жиҳати шундаки, агар бола бошқалар томонидан фарзандликка олинган бўлса ва бу бекор қилинмаган бўлса, ота-оналик ҳуқуқи тикланиши мумкин эмас.