Мактабгача ва мактаб таълими вазирлиги томонидан мактабларда 2022-2023 ўқув йилини якунлаш ва «Сўнгги қўнғироқ» тадбирларини ўтказиш бўйича тавсиялар ишлаб чиқилди. Вазирлик ишлаб чиққан тавсияларда белгиланишича, мактабларда «Сўнгги қўнғироқ» 25 май куни эрталаб соат 8:00 дан 9:00гача «Илмни қадрланг, илмга интилинг!» шиори остида ўтказилади. Тадбирга фақатгина 1-, 4-, 9-, 11-синф ўқувчилари иштирок этади. Шунингдек, «Сўнгги қўнғироқ»да маҳалла қўмитаси, битирувчиларнинг ота-оналар ва ҳуқуқни муҳофаза қилиш идоралари вакиллари қатнашиши тавсия этилган, мактаб ҳудудига техника воситалар ва бегона шахслар киритилмаслиги қайд этилган. Вазирликнинг маълум қилишича, «Сўнгги қўнғироқ» тадбирларида, босқичли назорат имтиҳонлари ва якуний давлат аттестацияларини ўтказишда, мактабларни янги ўқув йилига тайёрлашда ўқувчи ва битирувчилар ҳамда уларнинг ота-оналаридан пул йиғиш тақиқланади. Мактаб ҳаётида фаол иштирок этаётган ўқувчиларнинг ота-оналарини маънавий рағбатлантириш ҳам тавсия этилган.